සරත් ෆොන්සේකා මහතාට යුද අධිකරණය මගින් ලබා දුන් වසර දෙකහමාරක සිරදඬුවම මේ මස 26 වැනිදායින් අවසන් වන අතර සුදුකොඩි නඩුවට අදාළ අභියාචනය ලබන මස 2 සහ 3 යන දිනයන්හිදී විවාදයට ලක් කිරීමට නියමිත බවත්, ඒ අතරතුර අනෙක් චෝදනාව වන හමුදා සෙබළුන් ළඟතබා ගැනීමේ චෝදනාවට ඇප ලැබුණහොත් ෆොන්සේකා මහතාට තාවකාලික නිදහසක් ලබාගත හැකි බවත් නීතිඥ නලීන් ලද්දුවහෙට්ටි මහතා කියා සිටී.

සරත් ෆොන්සේකා මහතාට සුදුකොඩි නඩුවේ තීන්දුව මගින් වසර තුනහමාරක සිරදඬුවමක් නියම වූ අතර මේ මස 26 වැනිදායින් පසුව එම දඬුවම් කාලය ආරම්භවීමට නියමිතය.

නීතිඥ ලද්දුවහෙට්ටි මහතා ප‍්‍රකාශ කරන ආකාරයට සුදුකොඩි නඩුවේ තීන්දුවට විරුද්ධව ගොනු කළ අභියාචනය ලබන මැයි මස 2 සහ 3 යන දිනයන්වලදී විවාදයට ලක් කිරීමට නියමිතය. ඒ අතර කාලය තුළ අනෙක් චෝදනාව වන හමුදාවෙන් පැනගිය සෙබළුන් ළඟ තබා ගැනීමේ චෝදනාවට අදාළව ඇප ලැබුණහොත් ෆොන්සේකා මහතාට අභියාචනා තීන්දුව ලැබෙන තුරු සිරදඬුවමකින් තොරව කටයුතු කළ හැකිය. ලද්දුවහෙට්ටි මහතා වැඩිදුරටත් කියා සිටින්නේ මෙවර හෝ අභියාචනාධිකරණය මගින් සාධාරණ තීන්දුවක් ලැබෙනු ඇතැයි අපේක්ෂාවෙන් පසුවන බවයි.

මේ සම්බන්ධව අනෝමා ෆොන්සේකා මහත්මිය අදහස් දක්වමින් කියා සිටින්නේ තමන් තවමත් අධිකරණයෙන් යුක්තිය ඉටුවනු ඇතැයි අපේක්ෂාවෙන් පසුවන බවයි.

ෆොන්සේකා මහතාගේ රෝගී තත්ත්වයන්ද මේ වන විට උත්සන්නව ඇති බවත් ඒ සඳහා වැඩිදුර ප‍්‍රතිකාර ලබාදෙමින් ඇති බවත් ෆොන්සේකා මහත්මිය පැවසුවාය.